අද (2021-07-19) දින සිට මධ්‍යම සංස්කෘතික අරමුදලේ සියළුම ව්‍යාපෘතීන්, කෞතුකාගාර හා මධ්‍යස්ථාන සියළුම දෙස් විදෙස් සංචාරකයින් සඳහා විවෘතව ඇත. සෞඛ්‍ය අමාත්‍යාංශය මඟින් ලබා දී ඇති නිසි සෞඛ්‍යාරක්ෂිත ක්‍රමවේද අනුගමනය කරමින්, දුරස්ථභාවය රැකගනිමින්, මුහුණු ආවරණ පැළඳ මෙම ස්ථානයන්හී සංචරණයේ යෙදෙන ලෙස මෙමඟින් දැනුම් දෙමු.

 

මධ්‍යම සංස්කෘතික අරමුදලේ අධ්‍යක්ෂ ජනරාල් මහාචාර්ය ගාමිණී රණසිංහ මහතාගේ ප්‍රධානත්වයෙන්, සියලුම අධ්‍යක්ෂවරුන්, සහකාර අධ්‍යක්ෂවරුන් හා ව්‍යාපෘති කළමනාකරුවන්ගේ සහභාගීත්වයෙන් පසුගිය 09 වන සිකුරාදා දඹුල්ල අචාර්ය රෝලන්ඩ් සිල්වා අනුස්මරණ බිතුසිතුවම් සංරක්ෂණ ශාලාවේදී දැනට ව්‍යාපෘතිවල පවතින ගැටළු පිලිබඳ සාකච්ඡාවක් පැවැත්විණි.

එහිදී සියලුම නිලධාරීහු මධ්‍යම සංස්කෘතික අරමුදල නැවත නගා සිටුවීමේ සුබවාදී යෝජනා සහ අදහස් ඉදිරිපත් කළහ. මෙහිදී බුද්ධශාසන, ආගමික සහ සංස්කෘතික කටයුතු අමාත්‍යංශයේ ප්‍රධාන විගණන නිලධාරි විමල් R. ගමගේ මහතා විසින් ව්‍යාපෘති කළමනාකරුවන්ට මුල්‍ය කළමනාකරණය පිළිබඳව දැනුවත් කිරීමේ දේශනයක් පවත්වන ලදී.

රැස්වීමෙන් අනතුරුව, අධ්‍යක්ෂ ජනරාල්, ජාත්‍යන්තර සබඳතා හා සංචාරක අධ්‍යක්ෂ සහ දඹුල්ල ව්‍යාපෘති නිලධාරීන් විසින් දඹුල්ල ව්‍යාපෘතියේ ක්ෂේත්‍ර නිරීක්ෂණයක නිරත විය.

සෙත්සිරිපාය දෙවන අදියරේ හතරවන මහලේ පවත්වාගෙන යනු ලැබූ මධ්‍යම සංස්කෘතික අරමුදලේ ප්‍රධාන කාර්යාලය නැවතත් කොළඹ 07, බෞද්ධාලෝක මාවතේ, අංක 212/1 දරන පැරණි මුලස්ථානය වෙත ගෙන යන ලදී. පාලන අංශයත්, මාධ්‍ය අංශයත් ජාත්‍යන්තර සබඳතා හා සංචාරක අංශයත් එම ස්ථානයට යාබදව පිහිටි, බුලර්ස් පටුමගෙහි, අංක 37/33 දරන ස්ථානයේ ස්ථාපිත කරනු ලැබීය.

2021.03.30 දින උදෑසන 9.00ට යෙදුණු සුභ මොහොතින් මහා සංඝරත්නයේ ආශිර්වාදය සහිතව පිරිත් සජ්ඣායනයෙන් අනතුරුව එම ස්ථානයේ රාජකාරී කටයුතු ආරම්භ කරන ලදී. මෙම අවස්ථාවට, ගෞරවණීය මහා සංඝරත්නයත්, මධ්‍යම සංස්කෘතික අරමුදලේ අධ්‍යක්ෂ ජනරාල් තුමා ඇතුළු අධ්‍යක්ෂ මණ්ඩලයත්, කාර්ය මණ්ඩලයත් සහභාගී විය.

බිබිල, කොටසර පියංගල රජ මහා විහාරස්ථානයේ පිහිටි මහනුවර යුගයට අයත් ඉපැරණි ටැම්පිට විහාර ගෘහයේ බිතුසිතුවම් සංරක්ෂණය කිරීම 20.03.2021 දින 11.15 ට යෙදුණු සුබ මොහොතින්, මධ්‍යම සංස්කෘතික අරමුදල විසින් ආරම්භ කරන ලදී.